中環出更:室內設計唔易做 張國麟:要睇有冇風水陣

每個地方同城市要有活力同生氣,建築師可謂功不可沒。港深城市/建築雙城雙年展(香港)日前公布今屆嘅主題係「2x2(二城二):意像城創意」,卓妮喺嗰度見到2x2聯合策展人張國麟,佢話曾經因為諗漏咗風水問題而撞板。

張國麟話細個鍾意砌積木,又鍾意企喺條街度睇吓啲高樓大廈,覺得好特別,之後就入咗行。佢話建築師會參與項目,例如室內設計。問開好多人喺裝修之前都會拜四角,佢話都有但求心安,佢就冇呢個習慣,仲話做室內設計時都會諗埋啲風水問題,譬如房門唔好對爐頭等,曾經試過有客人冇出聲,佢就冇幫人去諗呢個問題,點知做好晒成個設計後,個客人原來係信風水,搞到要重新做過,佢仲話如果上到客人公司傾設計時,都會留意吓佢有冇擺風水陣,所以一定要問清楚!

葉小卡做通頂 梅詩華都捱得

喺活動上仲見到香港設計師協會會長葉小卡同2x2總策展人胡燦森。葉小卡話做建築師仲有好多範疇項目,有時搞吓啲文化活動,自己要親身落去個場地了解吓,上網search摷吓啲文獻等,佢仲話做得呢行閒閒地一個禮拜最少有兩日通頂,不過無所謂因為係興趣,最開心做出嚟嘅作品得到欣賞已經好滿足。

另一聯合策展人梅詩華(Sarah)就話讀中學時,媽媽畀咗一本建築書佢睇,自此之後就對建築開始感到興趣。咁女性做呢一行有時要落地盤會唔會畀人蝦?Sarah話都唔會,啲人對佢都好好。再問落到地盤有時好天曬、落雨淋會唔會比較辛苦?佢就話讀建築嘅女仔係好捱得嘅,有時建設一個地方出嚟畀唔同階層市民享用就算辛苦都值得嘅。

卓妮

第一手消息請下載on.cc東網iPhone/iPad/Android/Windows Phone Apps